سه شنبه 1388/04/30
تشککور
اولو تانری آدی ایله
تیلیم دئیر ایتیرمیشم بد ریمی
عززتیمِی، شؤکتیمی،صدریمی
دیریلیکده بیلمه دیلر قدریمــــی
بیله للر قدریمی اؤله ن دن سورا
من ده اوز نوبه مده وبوتون آشیقلار وچالیجیلاریمیز طرفیندن
موهندیس امیری جنابلاریندان وآرتیق تلاشلاریندان درین مینتدارلی
غیمیز بیلدیریریک،ها بئله مرغئی کندینین اهالی سیندن،اوزگه بولگه
لردن قورولتایا قاریشان خالقیمیزدان، ودده تیلیم خانی سئون لردن ،کی بو
ایسسی
هاوادا ،اوزاقدان ،یاووقدان بوقورلتایا ایشتراک ائدیبلر،بوتون
تدقیقاتچی عالیم ،شاعیر،یازیچی ،وآشیقلاردان،چالیجیلاردان،وده یرلی اوستاد دوکتور گونئیلی
جنابلاریندان واوستاد ائل شاعیری صمد عمی دن،قوم شاعیرلری
پالیزبان (سلیم خان) علی ایسلامی ، همدان شاعیرلری ،شاعیر فتح اللهی،زنگانین
بایرام نشریه سیندن محمد رزاقی وحمیدبیات ،
عزیز قارداشیمیز ائلشن ،موهندیس قهرمانی ،گنج شاعیریمیز قوم دان
چنلی بی ،قاراقانین گنج شاعیری علی رحمتی(شیدای خرقان) وهامی آشیق دوستلاریمیزدان ،وقارداشلاریمیز کی آدلاری
یادیمیزدان چیخیب ،اوزه لیکله موهندیس علیایی
کلیان(یاشیل)وسیامک بی (تورکوک بیز)جنابلاریندان تشککورلریمیزی بیلدیریره م
هامی نین اللریناؤپورم و
آیاقلارینین تؤپراقین گؤزومه سورمه چکه رک،
.وبویوک تانریدان هامی سینه اوزون عؤمور وجان ساغلیقی دیله ییرم، آللاه دان آرزی
واریم هامی نین اللری ساغ ،قلم لری گوجلو ،وآشیقلاریمیزین سسی
ساوالانین بوزبولاغلارکیمین دورو .وسازلاری کؤک دن دوشمه سین
بوشعری ده ائتحاف ائیله ییرم بوتون قوناقلاریمیزه
آرديني اوخويون
سه شنبه 1388/04/30
حکیم تیلیم خانین آلتینجی قورولتایی
حکیم تیلیمخانین آلتینجی قورولتایی / موهندیس علیائی کلیان (یاشیل)
قوراپيشيرن ۲۷, ۱۳۸۸
آلما یولو: آلتینجی “حکیم تیلیم خان” قورولتایی تیرآیینین ایگیرمی بئشینده ساوا شهرینین مرغئی کندینده کئچیریلدی.بو قورولتایدا اولکه میزین بوتون یئرلرینده ن او جومله ده ن: تهران، کرج، زنگان، همدان، قوم، شهریار، ساوا و باشقا بولگه لرد ه ن ایشتیراک ائتمیش و چوخلو “تیلیم خان” شوناس لار و هابئله شاعیرلر، یازیچیلار، عاشیقلار سوزلری وشئعیرلریله چیخیش ائتدیلر.
بو قورولتای موهندیس “اسداله امیری “جنابلاری، قاراقان ماحالی و مرغئی کندینین اهالی سینین یاردیمی ایله گوزه ل سویه ده تداروک گورولموشدو.دئمه لی بو قورولتای دا ساوا و قوم شهرینین شاعیر و یازیچیلاری چیخیش ائدنده ن سونرا، کرج و قلعه حسن خان بولگه لرینین ایشتیراک ائده ن لرینده ن اولان ان مشهور “تیلیم خان” شوناس دوقتور “حسین محمدخانی گونئیلی” کئچمیش قورولتایلار باره سینده دانیشیق آپارمیش و گله جک قورولتای لارین نئجه اولماسینی آچیقلادی.
قورولتایین دوامیندا کرج شهرینین مشهور خالق شاعیری ” اوستاد صمد مرادی” گوزه ل و ده یرلی شئعیرلریله مجلیسی ماراقلاندیردی.قوم شهرینده ن ایشتراک ائده ن گنج شاعیر “چنلی” ده یئنی شئعیری ایله کونوللری اوخشادی. قورولتایین سون واختیندا کرج شهرینده ن ایشتیراک ائده ن علیایی (یاشیل) وطن شئعیرلریله اوره کلرده دویغو یاراتدی.
دئمه لی بو قورولتای دا قاراقان بولگه سینین دهیرلی شاعیری “فتح اللهی” جنابلاری دا تیلیم خانین مزاری اوسته ائحساسلی شئعیرلر اوخودو. ایشتیراک ائده نلر “حکیم تیلیم خان” -ین مزارینی زیارت ائدندهن سونرا بو قورولتایا سون قویدولار.
بو قورولتای دا گورکملی عاشیق لاردان “گونش” جنابلاری، “عاشیق محیط” و چوخلو سؤز و ساز اوستادلاری دا ایشتیراک ائتمیشلر.
“حکیم تیلیم خان” قجرلر دوورونون تورک شاعیرلریندن اولموش. موهندیس “امیری ” نین امکداشلیغیلا بو گؤرکملی خالق و میللی شاعیرین بیرینجی دیوانی بیر ایل بوندان اونجه ایشیق اوزو گورموش و تئزلی ایکینجی دیوانی دا یاییلاجاقدیر.
کئچمیش قورولتای لار:
- بیرینجی قورولتای ۱۳۷۰ نجی گونش ایلی مئهر آیینین دوردو نجو و بئشی نجی گونو مرغئی، میصیرقان و بند امیرکندلرینده.
- ایکینجی قورولتای ۱۳۷۱ نجی ایل شهریور آیینین ایگیرمی آلتی سی و ایگیرمی یئددیسی گونلری مرغئی، یئل آباد و جوشقان کندلرینده.
- اوچونجو قورولتای ۱۳۸۵ ینجی ایل تیر آیینین اوتوزونجو گونو مرغئی کندینده.
ـ دوردونجو قورولتای ۱۳۸۶ ینجی ایل تیر آیینین ایگیرمی دوقوزونجو گونو مرغئی کندینده.
ـ بئشینجی قورولتای ۱۳۸۷ گونش ایلی نین تیر آیینین ایگیرمی آلتی نجی گونو مرغئی کندینده.
” حکیم تیلیم خان ” دان بیر شئعیرله سوزوموزه سون قویوروق.
بیلنلر بیلسین کی من تیلیــم خــانــام
بیلمه ین لر بیلسین، گووهــرم، کانــام
“مرغئی” ساکینی، اصلی ترکمـانــام
گـزه - گـزه بــو جهـانـدان گلـــیره م
اؤلکه میز “عیراق” دیر، شهریمیز ساوا
مـزلقـان چاییــنـدان گـوتـوردوم هــاوا
عـاشیقــلار دردینــه ائیلــه ره م چـارا
مـن طبیبــــم، هیندوستانــدان گلــیـره م
من اوز نووبه مده موهندیس “امیری” جنابلارینین آرتیق تلاش لاریندان درین میننتدارلیغیمی بیلدیریر و هابئله مرغئی کندینین اهالی سینه و بوتون تدقیقاتچی، عالیم، شاعیر و عاشیقلاردان او جومله ده ن: ده یرلی اوستادیم دوقتور “گونئیلی”، اوستاد شاعیر دوستوم “صمد مرادی”، قوم شاعیر لریندن ، همدان شاعیرلریندن، ساوا و قاراقان بولگه سینین اهالی سینده ن و عزیز قارداشیم رسول علیایی (ائلشن) جنابلاریندان و چیخارلی خالق خادیمی موهندیس”قهرمانی جنابلاریندان، “شاعیر فتح اللهی” و بوتون عاشیق دوستلاریمیزدان اوزه لیکله “عاشیق گونش جنابلاریندان تشککورلریمی بیلدیریره م.
کرج شهری - علیایی کلیان(یاشیل) گونش ایلی - ۲۶/۰۴/۱۳۸۸ جومعه گونو
دوشنبه 1388/04/22
شاه اسماعیل خطائی
شاه اسماعیل خطائی : بیر قوشما ُوبیر غزل
بوگون اله آلماز اولدوم من سازیم
عرشه دیره ک-دیره ک چیخماز آوازیم
دؤرد شئی واردیربیرقارینداشالازیم
بیر علیم،بیرقلم،بیرنفس،بیرساز
.........
گوزل!عالیم چیخسا،چیخسا چالینسا
بدیر آیلار کیمی دؤغسا،دؤلونسا
دؤرد شئی واردیربیر قارداشدا بولونسا،
بیر خئیروشر،بیر عبادت، بیر نیاز!
.........
یاز اؤلونجا چاییر_چمن اوستونه
ارمغان سونارلاردوستو دوستونا
دؤرد شئی واردیرآوی آلمیش دستینه
بیر شاهین،بیردؤغان،بیر اسپیر،بیر باز
...........
جاهل اولان سویلر،سوزونی بیلمز
میدانا گلینجه اؤزونی بیلمز
دؤردشئی واردیر جننت اوزونی گؤرمز
بیر منکر-منافق،بیر (یزید)قانماز!
..........
شاه خطاییم،آیدیر،سن قولون نئدر
گوزل دونیاسینی ترک ائدر گئدر
دؤردشئی واردیر،ایلدن ایله دؤر ائدر
بیرآی دیر،بیرگون دیر،بیر قیش دیر ،بیر یاز
...........
عاقبت ای مه ،منی عالمده حیران ائیله دین
چشمیمی گریان قیلوب،باغریمی بؤریان ائیله دین
خاطیریم مجموع ایکن،آشفته قیلدون ای پری
سن اونی زولفون کیمی،عمدا پریشان ائیله دین
شول گونش تک هجردن ای تلبه کؤنلوم بولدی کیم
غنچه تک باشدان باشا چاک گریبان ائیله دین
دلآراعاشیق لیگیم پنهان ایکن،سن ای پری!
خلق آراسن اونی یوز دیللرده دستان ائیله دین
جورعشقون ای حبیبیم ائیله حددن اؤتدی کیم
بو خطائی،خسته یه قانیمی آسان ائیله دین
شنبه 1388/04/20
افروز ومعصیم
معصیم، وافروز خانیم
چین شاهینین قیزی افروز خانیم دیر چؤخ گوزل دیر،گئجه نین بیرینده یاتموشودور
یوخودا بیر اوغلان گلدی یانینا ،باخدی گوردو اوغلان بوقدر گؤیچک دیر یئمه
ایچمه بو اوغلانا تاماشا ایله،
یمن اؤلکه سینده بیرتاجیر وار معصیم او تاجیرین اوغلودور!آللاه نئجه بولارین
یازقیسین یازدیریب کی ،قسمت اولاجاق لار بیربیرینه
قیز یوخودان دوروب!اوغلان دئییر بواوتاق منیمدیر!سن
هاردان بوراگلیب سن؟قیز دئییر اوتاق منیم دیر سن هاردان گلیب سن؟
معصیم بیر نیشانا گه تیردی کی بو اوتاق منیمدیر!قیز قبول ایله دی
دئدی:اوغلان گل بیر بیرینه بیر نیشانا وئرک بیزی بیر بیریندن آییرسال سالار من
سنین عشقیندن دوزه بیلمه رم!نیشانا اول سا مومکن دور بیر بیرین تاپا بیله ک
قیز بیر یاقلیق وئردی اوغلانا !اوغلان دا بیر اوزوک وئردی دئدی: من
یمن اؤلکه سینده تاجیر عزیز اوغلویام،قیز دئدی: من چین پادشاهی نین
قیزی یام آدیم افروز دیر.ایککی سی دانیشان یئرده یوخولاری آپاردی
بولاری پری لرین پادشاهی قیزی بیربیری نین یانینا گه تیرمیشدی
حؤکم ائیله دی سحرتئزدن قیزواوغلانی بیر بیریندن آیری سالدیلار
سحردن قیز دوروب یوخودان گوردو یانیندا اوغلان یوخدور
قیرخیمچه قیزلار چاقیردی!قیزلار:معصیم نئجه اولدو؟
قیزلار دئدیلر:خانیم معصیم نه اولا؟ یئمه لی دی ؟ ایچمه لی دی؟ نه دیر؟
افروزخانیم اوره یی تاب ائیله مه دی گورک نه دئییر:
سیزه قوربان اولوم قیزلار ..... قیزلار معصیمه نئجه اولدو؟
سوموک اؤدگوتوروب سیزلار...قیزلار معصیمه نئجه اولدو؟
قیزلار گورون هایاننایدیم.... سیخیم،سیخیم دوگونده یدیم
دونن گئجه یمن ده یدیم ... قیزلار یاریما نئجه اولدو؟
ایپک داسمالی دستیمده.... جانینی آلماق قصدیمده
ایککیمیزبیرتخت اوستونده... قیزلار پس یارا نئجه اولدو؟
افروز دئییر گور نیله رم... باغریمین باشین تیله رم
گنه یمنه گئده رم ... قیزلار معصیمه نئجه اولدو؟
قیزلار دئدی :خانیم بیرکس بورا گلمه ییب دئدی:قولاق وئرین:
سیزه قوربان اولوم قیزلار ......... یاری گوردوم باغ ایچینده
قؤللارین بوینوما سالیب..... دوداقلاردوداق ایچینده
عجب دوشدوم یامان گونه ....بیر قاصید گئدسین یمنه
آیاقیما ووروب کونده .... بیر قارا دوستاق ایچینده
افروز یانار جاوان چاقدا .... شاماما بسله نیر طاقدا
فیتله نئجه یانار یاغدا .... منده یاندیم یاغ ایچینده
آردی وار
دوشنبه 1388/04/15
اسلی وکرم
اسلی وکرم . اسلی آتا سی ایله دانیشماسی وموسلمان اولماقی
کرم زیاد خانین اوغلودور موسلمان دیر، اسلی قاراملیک قیزی ارمنی دیر
قارا ملیک هرگون اسلی نی قیناییر،اؤیود وئریر بالام بیزارمنی ،اولارایله
سویوموز بیر آرخا گئدمز،اسلی دئییر:آتا جان عاشق اولماییب سن،بوسوز
لری دئییر سن،کرمین عشقی گئجه نی منه گوندوز ائیله ییب،نئجه کرم سیز
دوزه بیللم؟ عاشیق اولان معشوق یولوندا جانین دا وئرر.نئجه کی بیسوتونو
عشق یاردی،شؤهره تین فرهاد آپاردی،آتا جان من چکن دردی بیر کیم چکه
بیلمز،مگر عاشیق اولا!عاشیق آتاجان: دینی نن ده گئچر! جانی مالی نیلیری
منده کرمین عشقیندن موسلمان اولارام !گور کیملر آتاجان گبرؤترسا ؤ ارمنی
ایمیش لر ایسته ییبلر وصالا یئتیشسینلر موسلمان اولوبلار! منده بیری .
حووانین عشقین دن حضرت - آدم
یاش توکه ردی گؤزلریندن دم ها دم
بیت المقدس ده خدیجه - مؤحترم
نور محمدی.ص. گوردو موسلمان اولدو
.......................
اوزون اؤدا سالدی جابیر- انصار
آللاهین امریندن اؤد اولدو گولزار
قنبر بؤت پرستی دیر اولدو جلودار
علی.ع.نین عشقیندن مو.سلمان اولدو
.....................
هانی مجنون کیمی داغلار دا قالان
هانی لیلی کیمی آه ؤ زار نالان
هانی یوسیف کیمی زیندان دا قالان؟
زولیخا گبریدی، عشقین دن موسلمان اولدو
.........................
آتا جانیم عشقی گور نئجه نردی؟
اؤدونا یانماق دا بیل چؤخ هونردی
سولیمان حؤکموندن دئولر گلردی
بولقیس گبریدی، عشقیندن موسلمان اولدو
...........................
فرهاد بیسوتون دا قازدی قایانی
شیرین گلدی قیلدی چؤخ تاماشانی
کرم نئجه داغیتدی خانی مانی
اسلی ارمنییدی ،عشقیندن موسلمان اولدو
.............................
دئدی :آتا جان اؤلدورر سن ،اؤلدورمنی ،آمما کرمی اونودا بیلمه رم
قاراملیک چیخدی گئده ائل بیی لر یانینا ،اولارینان فیکیرله شه بیر
یول تاپا. کرم گیزلینده گلیب قاری دایه یانیندا گیزله نیب، آمما قاری
اسلی وآتا سی دانیشانلاری کرمه دئدی!کرم نئجه آغلاییر ،اسلی بیر
کرمین سسین ائشید دیر، قولاق وئردی بیلدی کرم دیر، گلیب آنا سی
یانینا یالواریر آناجان: ایندی آتام گلیر،گورک آنا سینا نئجه یالواریر
باشی یا دولاننام گول اوزلو آنا
آنا جان دور گور چولده آغلایان کیمدیر؟
آغ سوتون اممیشم من قانا قانا
آنادورگور جیگر داغلایان کیمدیر؟
و.............................................
شنبه 1388/04/06
ظارافات
گئچن زامانلار بیزیم بولگه لرده نئجه ظرافات لار واریمیش!
کیشی : آرواد دور شامی گه تیر ایندی غم غوصصا گلی بیزی تاپی
آرواد: کیشی نه دی تله سیرن نه غم غوصصا بیزی یاخالاجک؟
کیشی :یادیندا گئچن ایل مشه قوربان عمی نین اششکی دوغدوآمما بیر قولاغی یؤخودور؟
آرواد: کیشی دلی دانیشما! مشه قوربان اششکی بیر قولاخ دوغوب بیزه نه وار ؟
کیشی :آروادهر نه اولاندان سورا قونشودور!قونشو ،قونشویا ایشی دوشه ر،قونشو غوصصاسی ،قونشونون دور،
سحر قؤدوخ اولار اششک !من مشه قوربان عمی دن آلیب آپاررام دگیرمانا
.دگیرماندان قه یی دن باش اششک بات سا پالچیقا قولاخ یؤخودور کی یاپیشام چه کم
پالچیخ دان چیخادام! اولاجک بیر بویوک غوصصا!
اوناگوره دئییرم تئز شامی گه تیر
غم غوصصا گلیب بیزی تاپماسین.
پنجشنبه 1388/04/04
آشیق قافار ابراهیمی
اولو تانری نین آدی ایله
سسی اوجا داغلاردان آشیب گلن،وائللریمیزه ایفتیخار یارادان آشیقلاریمیزین بیری ده
آذربایجانین گوزل شهری تبریزده اولان !
آشیق قافار ابراهیمی دیر.نئجه کی
سایین یازیچیمیز بهروز ایمانی بئی بویور کی: اودا آشیقین وطنه اولان محبتیندن،
آرديني اوخويون
دوشنبه 1388/04/01
شاعیر صمد مورادی
اولو تانری نین آدی ایله
گلین شاعیریمیزین سؤزلریندن قاباق ،اؤزایله تانیش اولاق!
صمد تخللوصو ایله تانینان شاعیر صمد-مورادی 1330 -نجی ایلده
بؤستان آوا شهرینین جانبهان کندینده دونیایا گلمیشدیر.ایلک مکتب
تحصیلینی کندده اؤخوموش،سونرا تهراندا ایشلمه یه گله رک اؤرتا
مکتب تحصیلی آلماغادا باشلامیشدیر.اؤبعضی سببلره گوره دیپلم آلار
آلمازاؤخولدان الچکمیشسه ده،همین ایللرده باشلادیغی شعر صنعتی نی
وارگوجایله داوام ائتمیشدیر اؤنون ایککی کیتابی (آغلار- گولر) وبیرده
تورشا - شیرین .تبریز،اردبیل ،اورمو،زنجان، تهران، قوم،باکی وباشقا
یئرلرده بوراخیلان نشریه لرده بیر چؤخ شعر پارچالاری چاپ اولموشدور
ایندی آشاقیدا یازیلان غزل بو حؤرمتلی ائل شاعیرین دیر.
تانریدان بو سایین شاعیریمیزه اوزون عؤمور وجان ساغلیغی دیله ییرم
دولاندیر مجلیسی ساقی،اؤجامی گلمیشم جانـــــــه
وئر اوکؤهنه شرابیندن ایچیم پیمانه - پیمانــــــــه
اؤ می دن وئرکی مست ائتسین ،اورکدن غملریم گئتسین
ویا ائتسین مئی مجنون ،قاچیم دشت ؤ بیابانـــــــــــــه
اؤزون اینسان سانانلارین چؤخوندان قاچماییم ، نئیلیم ؟
مؤحبت اؤلدوسرگردان ،صیداقت دوشـــــــدو زیندانه
دییانــــــــت یؤخدو زاهد ده ،عبادت یؤخدو عابید ده
آچان موشگیللری پولدور ،باخان یؤخ دینــــــه -ایمانه
بــــو نامرد دونیاسیندا چؤخ حقیقت آردیجا گـــــــــزمه
هئچ عاقیل اعتیبار ائتمز نـــه گبره ،نه موسلمانــــــــــه
سؤرور مظلوملارین قانــــــین نــــــدن ظالیملر ای ساقی ؟
یامان بیر دؤورانا چاتدیق،گله لعنت بو دؤورانـــــــــــه
منی چیوریتدی مؤسلمله نصاراد یـــــــــــــرؤمسجید دن
اؤدورکی مسکنیم ایندی اؤلوبدور کؤنج - میخانــــــــــه
دیانت اهلی عالمده یؤلوندان چیخماسا حتــــــــــــــــــــما -
ملکلر صف چکیب ســـــجده ائـــــدرلر ائیله اینسا نــه
(صـــــمد) صادق سن عشقینده،ال اوز دار ؤنـــــــداریندن
وصالین ائتسین حق آسان ،الین چاتسین اؤ جــــــــــــانانه
