آذربایجان یازیچیلار و شاعیرلری
اورمیه نین آدلیم و چاغداش شاعیرلریندن آد آپاراندا بیت اله جعفری ده ایستر ـ ایسته مز دیله گلیر. او، ۱۳۳۲جی ایلده اورمیه ده آنادان اولوب، سیاسی علملر بؤلومونده یوکسک لیسانس آلاراق ، اورمیه نین توپلومسال ـ ادبی فعالیت لرینده اؤزونو گؤسترمیشدیر. جعفری ایکی دؤوره مجلیسه نوماینده سئچیلیب، بونولا بئله ادبی یارادیجیلیغی ایله شهرت قازانمیشدیر. اونون "قان بایرامی" آدلی کتابی شاعیرین شعر توپلوسونو تشکیل ائدیر. بیت اله چعفری نین ادبی ایشلرینی دیرلندیره رک، جان ساغلیغی و یئنی باشاریلار دیله ییریک. ایندی بیر شعرینی باهم اوخویالیم:
آنا یوردوم منه شان و شرفدیر،
فخر ائده رم دوغما وطن ایرانا.
: "باقر خان"لار، "ستارخان"لار اوغلویام،
جان دئمیشم قوربان آذربایجانا.
بو توپراقدان سوموک ـ ایلیک ، جوهریم،
هر قاریشی ظولمه قارشی سنگریم،
"حُبّ الوطن" ازل گوندن ازبریم،
گووه نه رم بو ایلقارا ـ ایمانا.
من قارتالام، زیروه لردن دوشمه نم،
دارلیق سئوه ن بایقوشلارا دوشمنم،
باشدان کئچیب وطنیمدن کئچمه نم،
باش اگمه رم اجنبی یه ـ دوشمانا.
آند ایچمیشیک گؤیدن گلن قورآنا،
خطر چاغی قان سوووراق میدانا،
سگگیز ایل دایاندیق مرد ـ مردانا،
ظفر چالدیق عجب بؤیوک شیطانا!
"جعفری"یم سؤز بحرینده اوزه رم،
اینجی تاپیب "ساری تئل"ه دوزه رم،
مضراب اولوب تئل اوستونده گزه رم،
اهل ایسته رم سؤز قاندیرا، سؤز قانا.
